Ein Clwb Amrywiaeth Ysgol a’n Cyfrif Cyfryngau Cymdeithasol ar Amrywiaeth
Rydyn ni’n Glwb Amrywiaeth sy’n cynnal cyfarfodydd amser cinio wythnosol yn yr ysgol, gyda chefnogaeth tri o’r athrawon a’n pennaeth. Darparu “lle diogel” i fyfyrwyr yn ein hysgol yw prif flaenoriaeth ein grŵp. Rydyn ni hefyd yn hyrwyddo amrywiaeth a chydraddoldeb ar draws yr ysgol, rydyn ni wedi cynnal gwasanaethau, ac fe wnaethon ni greu fideo ‘amrywiaeth’ ysgol yn ddiweddar i hybu agwedd gadarnhaol a derbyniol tuag at y corff, rhywedd a rhywioldeb, a ddangoswyd o amgylch yr ysgol mewn grwpiau tiwtor dosbarth. Mae rhai myfyrwyr hefyd wedi cynrychioli ein hysgol ar y materion hyn trwy gymryd rhan mewn cynadleddau a digwyddiadau addysgol.
Mae pedwar myfyriwr yn ein grŵp hefyd yn gweithredu cyfrif Instagram ar y cyd ar ‘amrywiaeth’ sy’n hybu negeseuon cadarnhaol a chefnogol am bobl LGBTQA+. Rydyn ni fyfyrwyr yn cynnal y cyfrif hwn fel unigolion preifat, ond mae ein hysgol yn rhoi cefnogaeth anffurfiol i ni. Fel myfyrwyr sy’n cynnal y cyfrif, rydyn ni’n gwerthfawrogi nad yw’r ysgol yn ceisio ei reoli. Rydyn ni’n trafod y cynnwys rydyn ni’n ei rannu yn aml yng Nghlwb Amrywiaeth ein hysgol, ac yn meddwl am beth sy’n cael ei ddysgu am rywedd a rhywioldeb trwy’r cyfrif. Rydyn ni’n gwybod ein bod ni hefyd yn gallu trafod gyda’r athrawon sy’n hwyluso ein Clwb Amrywiaeth sut gallen ni ymdrin ag unrhyw faterion sensitif am rywedd a rhywioldeb a allai godi ar-lein.
Rhoi’r Si ar Led gydag Instagram
Safle rhwydweithio cymdeithasol ar gyfer rhannu lluniau a fideos yw Instagram sy’n caniatáu i gynnwys gweledol gael ei rannu a’i drefnu gydag amryw hashnodau. Ar ôl gweld cyfrifon eraill am amrywiaeth ar Instagram sy’n hybu negeseuon cadarnhaol am hunaniaeth LGBTQA+, fe benderfynon ni greu ein cyfrif ein hunain. Fe ddechreuon ni bostio negeseuon cadarnhaol sy’n dathlu perthnasoedd amrywiol ac yn herio homoffobia, trawsffobia, heterorywiaeth a normau rhywedd. Rydyn ni’n defnyddio cynnwys rydyn ni’n dod ar ei draws ar Tumblr, Twitter ac Instagram a’i ail-bostio gyda phenawdau a negeseuon cadarnhaol.
Mae gweithio ar ein cyfrif Instagram yn caniatáu i ni chwarae rôl weithredol yn ein cymuned, a lleisio’n barn am y pethau rydyn ni a phobl eraill LGBTQA+ yn poeni amdanyn nhw, o fwlio, anfodlonrwydd â’r corff a phwysau gan gyfoedion i bryderon iechyd meddwl. Yn ogystal â’r pedwar myfyriwr gwreiddiol, mae saith ohonon ni bellach sy’n cynnal y cyfrif ac mae gennym ni dros 5,000 o ddilynwyr!
Mae rhoi’r si ar led trwy ein cyfrif Instagram yn ffordd amlgyfrwng ddifyr o ddefnyddio delwedd, fideo a thestun i ledaenu negeseuon cadarnhaol am faterion LGBTQA+ yn gyflym o un person i’r llall. Mae ein cynnwys yn aflonyddu’r arddangosiadau gweledol cyfarwydd o gyrff wedi’u steileiddio a welir ar Instagram â negeseuon doniol, gobeithiol ac iachaol o blaid cydraddoldeb. Mae ein hagwedd gadarnhaol at LGBTQA+ yn ymestyn allan gan greu newid yn ein cymunedau ysgol ein hunain a thu hwnt.
Teithio all-lein
Roedden ni’n ofni i ddechrau beth fyddai’n digwydd petai pobl eraill o’r ysgol yn ein dilyn ni, ond dros amser fe welon ni fod mwy a mwy o’n cyfoedion yn dechrau dilyn y cyfrif a phostio sylwadau cefnogol arno. Mae llawer o’n cyfoedion yn mynd ar y cyfrif i’w haddysgu eu hunain am faterion LGBTQA+ ac mae hyd yn oed wedi bod yn allweddol wrth ddenu mwy o fyfyrwyr i’n Clwb Amrywiaeth yn yr ysgol. Rydyn ni hyd yn oed wedi cael gwahoddiad i gyfrannu at gynhadledd Cydraddoldeb Rhywedd ar ran ein Clwb Amrywiaeth, a roddodd gyfle i ni rannu beth rydyn ni wedi’i ddysgu o gyfryngau cymdeithasol.
Cadw’n ddiogel ar gyfryngau cymdeithasol
Cyn i chi ddechrau cyfrif cyfryngau cymdeithasol i gynyddu ymwybyddiaeth, mae’n ddefnyddiol meddwl am yr holl bobl y gallwch droi atyn nhw a dibynnu arnyn nhw os bydd arnoch angen mwy o gefnogaeth. Rydyn ni’n aml yn troi at riant neu athro/athrawes pan fydd arnom angen ychydig fwy o arweiniad. Mae ein hawgrymiadau da yn cynnwys peidio ag ymateb pan fydd pobl sy’n postio ar eich cyfrif yn gwrthod gwrando ac yn lledaenu casineb grwpiau eraill o bobl (e.e. hiliaeth, rhywiaeth, homoffobia). Gallech ddymuno dileu postiadau sy’n lledaenu casineb. Mae’n bwysig sylweddoli na fyddwch yn gallu newid meddwl pawb. Rydyn ni’n canolbwyntio ar ledaenu negeseuon cadarnhaol i bobl sy’n gwerthfawrogi ein cyfrif amrywiaeth a thrafod materion mewn ffordd adeiladol.
Rhybudd Sbardun
Arwydd bach o undod ar ddechrau testun, fideo neu lun sy’n tynnu sylw eich dilynwyr at y ffaith ei fod yn cynnwys deunydd a allai achosi gofid.
