Grŵp o 14 o fyfyrwyr ysgol uwchradd ydyn ni a gafodd gyfle i gyfarfod â Helen Walbey, rheolwr gyfarwyddwr yr unig iard hen rannau beiciau modur a sgwteri yng Nghymru. Gyda’n gilydd, gyda chefnogaeth ein hathrawon Dylunio a Thechnoleg, ein hathro Celf, pennaeth ein blwyddyn a’n swyddog cynhwysiad, rydyn ni’n creu ein ‘coeden berthnasoedd’ ein hunain o gelfyddyd sothach. Cerflun byw yw hwn, ac rydyn ni’n gobeithio y bydd pobl ifanc eraill yn gallu ychwanegu ato dros y blynyddoedd gyda’u negeseuon ynghylch beth sy’n creu perthynas gadarnhaol.
DYMA EIN STORI HYD YMA...
1: Beth sy’n creu perthynas dda?
Fe lunion ni fap meddwl o’r holl berthnasoedd gwahanol, cadarnhaol roedden ni’n eu mwynhau: cariadon, ffrindiau, teulu, anifeiliaid anwes, neu fannau a gwrthrychau arbennig.
2: Gwau gweoedd perthynas
Fe ddewison ni ein hoff berthynas (e.e. ein ci, neu mam-gu). Fe ddefnyddion ni hyn i gwblhau fersiwn wedi’i haddasu o graff perthnasoedd BISH.COM. Gan ddewis a graddio pethau sy’n gwneud ein perthynas yn un dda, fe gysyllton ni’r dotiau i greu gwe perthynas.
3: Dyfeisio micro-gerfluniau sgrap
Wedi’n hysbrydoli gan artistiaid sothach a phentwr bach o ddeunyddiau sgrap, llunion ni ein cerfluniau bach ein hunain mewn 10 munud.
4: Ymweld â’r iard sgrap a chael hyd i’n deunyddiau
Gyda’n llyfrau nodiadau yn ein dwylo, aethon ni ar fws mini i iard sgrap Helen. Cawson ni ddigon o syniadau o’r deunyddiau. Fe wnaethon ni restr o bopeth roedden ni’n meddwl gallai fod ei angen. Roedd teiars, drychau ochr, brêcs, ceblau lliw, a goleuadau arwyddo yn ddewisiadau poblogaidd.
Yn ôl yn yr ystafell ddosbarth, wedi’n hysbrydoli gan gerflun ‘Dandilion’ Karen Cusolito (2010) a’r geiriau o’n gweoedd perthynas, fe benderfynon ni greu cerflun byw y byddai pobl ifanc eraill ar hyd y blynyddoedd yn gallu ychwanegu ato a’i bersonoli.
5: Drilio, llifio, torri â laser, bolltio
Fe gawson ni lawer o hwyl yn dysgu sgiliau newydd i greu ein coeden berthynas o deiars.
Fe ddefnyddion ni’r dril llaw a’r peiriant turnio i greu’r gwaelod pren, a’r peiriant llifanu ongl a’r llif law i dorri’r teiars. Helpodd y torrwr laser ni i sgathru ein geiriau ynghylch natur perthynas gadarnhaol ar deils llechi. Byddwn ni’n hongian y rhain ar ein coeden deiars gan ddefnyddio gwifrau trydan lliwgar.
Ar hyd y ffordd, fe greon ni logo ein prosiect R&R allan o sgrap, a chalon allan o gadwyni a drychau ochr. Mae pob drych yn adlewyrchu rhywun neu rywbeth arbennig yn ein bywydau.
Ein coeden berthnasoedd
Fe gawson ni ganiatâd arbennig i roi ein cerflun byw ar y trothwy rhwng mynedfa’r ysgol a’r gymuned leol. Pan fyddwn ni wedi gorffen, rydyn ni’n gobeithio y gallwch chi weld y drychau ochr yn disgleirio yn yr heulwen o bell.
Ein breuddwyd yw y bydd y goeden yn symbol o bwysigrwydd ein perthnasoedd i ni a’n cymuned, a pha mor bwysig gallan nhw fod.
Ar y ffordd, fe fuon ni’n rhannu ein stori ar fyrddau arddangos yn neuadd fwyd y cantîn, ac ar bosteri yn yr ystafell ddosbarth Dylunio a Thechnoleg.
Cliciwch yma i gael mwy o syniadau ac adnoddau ynghylch sut gall celf weledol gynyddu ymwybyddiaeth a chreu newid.
GEIRIAU TEIMLO’N DDA
agos
cyfartal
bod yno
atgofion
ymddiried
gofal
hwyl
deall
cwlwm
pethau da
caredigrwydd
sicrwydd
teimlo’n dda
meddal
cyfeillgarwch
teimlo’n ddiogel
annibyniaeth
parod i helpu
cyfle i chwerthin
cael gofal
cariad
cefnogaeth
ARTISTIAID CELF SOTHACH ERAILL SYDD WEDI’N HYSBRYDOLI
Asim Waqif
Beverley Glover
Chakai Booker
Dilmprizulike
Ivor Davies
Jean Tinguely
Marisa Merz
Tim Noble a Sue Webster Cornelia Parker
HA Shult
Anne Carrington
Margaret Hogan
DANDILION (2012)
gan Karen Cusolito
“Mae’r Dant-y-llew yn un o lawer sydd wedi cael hyd i ffordd trwy’r craciau ym mhalmentydd y dref. Mae mor gymdeithasol ag y mae’n hardd, ac mae wedi’i ddylunio i oroesi yn yr amodau caletaf. Mae’n sefyll fel symbol o gryfder, gobaith a gwydnwch”
Uchder: 20 tr. Ôl troed: 14tr X 14tr. Pwysau: 2 dunnell. Cyfansoddiad: Dur a arbedwyd. Peirianneg: Yn sefyll heb gynhaliaeth
Lawrlwythwch yr astudiaeth achos yma:
