Creu deiseb yw un o’r ffyrdd mwyaf traddodiadol o sicrhau bod eich llais yn cael ei glywed a galw am newid. Yn y bôn, rydych chi’n anfon cais clir at wleidydd ynghylch yr hyn rydych chi am ei newid, wedi’i lofnodi gan gynifer o gefnogwyr â phosibl. Mae deisebau ar-lein yn ffordd fwyfwy poblogaidd o gysylltu ag eraill. Mae llawer o bobl yn defnyddio Facebook i hyrwyddo, rhannu a chasglu llofnodion ar gyfer deisebau.
Pan oedd hi’n 17 oed, dechreuodd ac enillodd Fahma ymgyrch gyda’i ffrindiau trwy Change.Org, sef gwefan deisebau ar-lein. Galwodd ei hymgyrch ar yr ysgrifennydd addysg i ysgrifennu at arweinwyr pob ysgol gynradd ac uwchradd i sôn am beryglon anffurfio organau rhywiol merched (FGM) cyn gwyliau’r haf, pan fydd merched yn y perygl mwyaf. Gwrandewch ar y grŵp yn siarad am eu hymgyrch yma.
Gall unrhyw un ddeisebu llywodraeth y Deyrnas Unedig ar yr amod ei fod yn Ddinesydd Prydeinig neu’n byw yn y Deyrnas Unedig. Os bydd deiseb yn cael 10,000 o lofnodion, bydd y llywodraeth yn ymateb. Os bydd yn cael 100,000 o lofnodion, bydd yn cael ei hystyried i’w thrafod yn y senedd. Dysgwch fwy am sut i gyflwyno deiseb i Lywodraeth a Senedd y Deyrnas Unedig yma.
Mae gan Gynulliad Cenedlaethol Cymru Bwyllgor Deisebau - ar yr amod eich bod chi’n casglu 10 llofnod, bydd gwleidyddion yn y Cynulliad yn trafod eich mater. Gall fod yn ffordd wych o gynyddu ymwybyddiaeth o’ch ymgyrch. Dysgwch fwy am sut i gyflwyno deiseb i’r Cynulliad yma.
Mae grŵp o fyfyrwyr blwyddyn chwech wedi bod yn dysgu am gydraddoldeb a hawliau rhywedd a rhywiol trwy’r flwyddyn. Aethon nhw ati i lunio ymgyrch a oedd yn annog pobl i feddwl am effaith niweidiol stereoteipiau rhywedd. Gwisgodd y myfyrwyr mewn pinc a glas am ddiwrnod i gynyddu ymwybyddiaeth o liwiau stereoteipio. Creodd y grŵp hefyd rubanau yn null yr ymgyrchwyr dros bleidlais i fenywod (suffragettes) er mwyn amlygu sut roedd eu hymgyrch yn ymwneud â materion ehangach hawliau cyfartal. Yna, fe wnaethon nhw gychwyn deiseb ar change.org i gynyddu ymwybyddiaeth o stereoteipio rhywedd, a gwahodd eraill i ymuno â’u hachos.
I gael gwybod mwy am FGM, a sut mae pobl ifanc yng Nghymru yn mynd i’r afael â’r mater hwn, darllenwch am yr ymgyrch poster a ffilm, Lleisiau Dros Ddistawrwydd.
Gweler hefyd www.avaaz.org - sef mudiad byd-eang ar y we a chymuned ymgyrchu ar-lein sy’n dod â ‘gwleidyddiaeth y bobl i brosesau penderfynu ym mhobman’.
Lawrlwythwch y PDF Syniad am Newid yma:
