Mae ymchwilwyr gwyddorau cymdeithasol yn archwilio’r berthynas rhwng pobl â’i gilydd ac yn ceisio defnyddio eu canfyddiadau i wneud y byd yn lle tecach. Mae llawer o wahanol ffyrdd o ymchwilio i’r byd cymdeithasol, o gyfweliadau ac arolygon i arsylwadau a dulliau creadigol, fel lluniadau neu adrodd storïau digidol.
Gwnaeth pedwar myfyriwr Blwyddyn 10 Stori Cardiau Fflach ynglŷn â pham y dylai ysgolion fod yn gwneud mwy i fynd i’r afael â chydraddoldeb rhywedd, trais yn erbyn menywod a merched, a thrais rhywiol ac ar sail rhywedd. Fe ddefnyddion nhw amrywiaeth o ddulliau i gael adborth o’u prosiect a’u hymgyrch.
Fe ddylunion nhw holiadur ticio blychau byr a oedd yn cynnwys lle i ychwanegu sylwadau ysgrifenedig hirach. Yn ogystal, gwahoddwyd staff a myfyrwyr i lenwi ‘swigen siarad’ ar sut oedd y prosiect wedi gwneud iddyn nhw deimlo (e.e. “hapus, trist, syfrdan”). Trwy ofyn i bawb beidio ag “ysgrifennu eu henw” ar y ffurflenni, sicrhawyd bod yr holl ymatebion yn ddienw - rhan bwysig o’u moeseg ymchwil.
